தமிழர் வீரம்
சண்முக. ஞானசம்பந்தன் மதுரை வானொலி (பணிநிறைவு);
மனித குலமானது நாடோடி இனக்குழுக்களாக மாறிய காலந்தொட்டு ஒன்றோடொன்று போரிட்டே வந்திருக்கிறது. இதற்குத் தமிழர்கள் மட்டும் விதிவிலக்கானவர்கள் அல்லர். தொன்மைத் தமிழ் நாட்டில், நடந்தே கடந்து செல்ல இயலும் சுமார் 25 கிலோ மீட்டர் தூரமும் பின்னாளில் குதிரைகள் மூலம் கடந்து செல்ல இயலும் சுமார் 60 கிலோ மீட்டர் தூரமும் கொண்ட நிலப்பரப்பே சிறு நாடாக உருக்கொண்டிருக்க முடியும். இயற்கைச் சீற்றம், மழை வளம் குறைந்து பஞ்சம், வேட்டைக்காடுகளின் போதாமை ஆகியவற்றால் இந்த எல்லைக்குள் உள்ள வயல்கள், கால் நடைகள், பெண்டிர், குழந்தைகள் ஆகியவற்றைப் பாதுகாப்பதே அன்றைய தமிழர்களுக்கு பெரும் போராட்டமாக இருந்திருக்கும் என்பதனை வெட்சி, வஞ்சி, உழிஞை, தும்பை, வாகை, நொச்சி, கரந்தை போன்ற புறத் திணைகள் மூலம் யூகிக்கலாம். காலஞ் செல்லச் செல்ல பரஸ்பர பாதுகாப்புக் கருதி, சுமார் 150 கி.மீ ஆரம் கொண்ட நிலப்பரப்பு இணைந்து மூவேந்தர் நாடுகளாக விரிவடைந்திருக்க இயலும். ;
