எழுத்தாளர் தேரூர் கோபி;

சுத்துக்கட்டு வீடு. வீட்டின் பின்னே நெற்கதிர்களை அடிப்பதற்கான களம். ஒரு பக்கம் மாட்டுத்தொழுவம். இன்னொரு பக்கம் பனை உயரத்துக்கு வளர்ந்து பரந்த அடர்ந்த வேப்பமரம். நூறு வயதினைத் தாண்டியிருக்கும். வண்டிமாடு, உழவு மாடு, மாட்டுத் தொழுவம் இருந்த அடையாளங்களே எஞ்சியிருந்தன. தற்போது ஏதும் கிடையாது. அம்மா இறந்து பல வருடங்களாகியும் பிரச்சனையில்லாமல் ஓடிய கூட்டுக் குடும்பம், அப்பா இறந்ததுமே அண்ணன் தம்பிக்குள் பிரச்சனை எழுந்தது. அப்பா இருக்கும்வரை ஒற்றுமையாக இருந்த அண்ணன், தம்பி குடும்பங்கள் அவர் இறந்து பதினாறாவது நாள் முறுக்கிக்கொண்டன. பதினாறு நாள் செலவை பங்கு வைக்கவேண்டும் என அண்ணன் அடம்பிடிக்க, எல்லாச் செலவும் அப்பா வச்சிட்டுப்போன பொதுப்பணத்திலதானே செலவு செஞ்சே என தம்பி கேள்வி எழுப்ப.. அதுவரை இருந்த அண்ணன் தம்பி அன்னியோனியம் தொலைந்து போயிற்று. வீட்டைப் பங்கு வைத்துவிடுவது என முடிவாயிற்று. இரு குடும்பமும் தனித்தனியாக இருக்கும் வகையில்தான் அந்த வீட்டை அப்பா வடிவமைத்திருந்தார். எனவே பிரச்சனை இருக்காது.;